黄慧君，係香港嘅電視監製，人稱「花姐」，代表作品係ViuTV選秀節目《Good Night Show 全民造星》。 黃慧君喺1990年代頭投身電視界，曾經喺無綫電視做過十三年工，由《勁歌金曲》嘅助理編導（PA）做起，第二年就升做導演，參與過《翡翠歌星賀台慶》、《香港小姐競選》、《新秀歌唱大賽》等節目嘅製作。後尾佢跳槽到now TV，再隨住ViuTV開台而做咗ViuTV嘅監製。 黃慧君做ViuTV監製期間，參與過《慳D啦Honey》同《脫獨工程》嘅監製工作。到2018年佢監製嘅選秀節目《Good Night Show 全民造星》出街後引起好大迴響，令佢開始畀唔少觀眾認識。《全民造星》播完後，佢又選出兩批參賽者組成男子組合Mirror同Error，重拍住Error做幕前演出，包括《花姐ERROR遊》同《ERROR金豬賀歲暨花姐巡遊》。